Foto nga VCG
24 deputetë të Parlamentit Evropian, përmes një letre drejtuar autoriteteve të BE-së, kërkojnë hetim për akuzat për manipulim në zgjedhjet në Serbi, ku u shpall fitues Aleksandër Vuçiç, shkruan “Panorama”.
Lajmi është njoftuar nga kryetari i Komisionit të Jashtëm të Bundestagut, Michael Roth, me anë të një postimi në rrjetet sociale.
“I dashur, president Aleksandër Vuçiç! Ky s’është as komplot dhe as fushatë socialiste. Ju jeni totalisht i izoluar. 24 deputetë nga e gjithë Europa i bëjnë thirrje BE-së që të hetojë në mënyrë të pavarur akuzat për manipulim dhe të bëjë rekomandime për të siguruar zgjedhje të lira dhe të ndershme në Serbi”, shkroi ai.
Në letër, deputetët europianë thonë se e duan Serbinë brenda një dekadë në BE, por se për këtë duhet një demokraci funksionale në këtë vend.
“Në hijën e pretendimeve për manipulime masive zgjedhore gjatë zgjedhjeve parlamentare dhe lokale serbe, që u zhvilluan më 17 dhjetor 2023, i bëjmë thirrje BE-së të kryejë një hetim të pavarur për të gjitha parregullsitë zgjedhore të raportuara dhe pretendimeve për mashtrim. Qëllimi ynë i përbashkët është ta shohim Serbinë si anëtare të Bashkimit Europian brenda kësaj dekade. Një kërkesë e domosdoshme për këtë është një demokraci funksionale dhe shteti ligjor. Manipulimet masive zgjedhore të vëzhguara nga misioni ndërkombëtar për vëzhgimin e zgjedhjeve dhe vëzhguesit e pavarur të shoqërisë civile janë shkelje të qarta të parimeve të zgjedhjeve të lira, të barabarta dhe të fshehta dhe të cilat s’janë në pajtim me këtë kërkesë. Kjo ngre shqetësime të mëdha për legjitimitetin e rezultateve zgjedhore në nivel kombëtar dhe veçanërisht në lidhje me zgjedhjet për Kuvendin Komunal të Beogradit”, thuhet ne letër.
Nënshkruese e letrës është edhe deputetja britanike për çështjet në Ballkanin Perëndimor, Alicia Kearns, si dhe kryetari i Komisionit të Punëve të Jashtme të Ukrainës, Oleksandr Merezhko. Po ashtu, deputetë nënshkrues janë edhe nga shtete të tjera përfshirë Francën, Italinë, Republikën Çeke, Kroacinë, Irlandën etj. (Irma)
