Foto RTSH
Mbretëria e Bashkuar bëri të ditur se është e përkushtuar ndaj objektivit për të katërfishuar energjinë bërthamore deri në vitin 2050.
Qeveria britanike ka njoftuar planet për atë që e cilësoi “shtimin më të madh të energjisë bërthamore në 70 vjet”, për të forcuar pavarësinë e saj energjetike dhe për të përmbushur objektivat e emetimit të karbonit, shkruan “RTSH”.
Planet përfshijnë eksplorimin e ndërtimit të një stacioni të ri të madh të energjisë dhe 382 milionë dollarë investime për prodhimin e përparuar të uraniumit.
“Energjia bërthamore është antidoti i përsosur për sfidat e energjisë me të cilat përballet Britania. Është e gjelbër, më e lirë në afat të gjatë dhe do të rrisë kapacitetet e energjisë në Mbretërinë e Bashkuar. Ky është vendimi i duhur afatgjatë dhe është hapi tjetër në angazhimin tonë për energjinë bërthamore, e cila na vë në kurs për të arritur zero neto deri në vitin 2050 në një mënyrë të matur dhe të qëndrueshme”,- deklaroi kryeministri Rishi Sunak.
Qeveria britanike shprehet e angazhuar në objektivin neto zero të vitit 2050. Por ajo po përballet gjithashtu me një krizë të kostos së jetesës së shkaktuar pjesërisht nga rritja e çmimeve të naftës dhe gazit.
Sipas qeverisë britanike, zgjerimi i energjisë bërthamore do të zvogëlonte faturat e energjisë elektrike, do të mbështeste mijëra vende pune dhe do të përmirësonte sigurinë e energjisë në vend. (Irma)