Avion (Foto Aeroporti Nderkombetar i Tiranes)

Aeroporti Ndërkombëtar i Tiranës njoftoi se gjatë gjithë vitit 2023 u ka shërbyer 7.257.634 pasagjerëve, duke e cilësuar një moment historik të rëndësishëm.

Në një deklaratë të publikuar në faqen zyrtare të TIA-s thuhet se kjo arritje shënon një rritje të konsiderueshme prej 40% krahasuar me një vit më parë dhe 117% më shumë se viti 2019, duke forcuar pozicionin e TIA-s si një lojtar kyç në industrinë rajonale të aviacionit.

Viti 2023 shfaqi rritje të qëndrueshme përgjatë muajve të ndryshëm, duke theksuar përkushtimin e aeroportit për të ofruar shërbime të shkëlqyera dhe për të nxitur udhëtimin ajror.

“Totali kumulativ prej 7.257.634 pasagjerësh në vitin 2023 është një dëshmi e përkushtimit të TIA-s për përsosmëri, efikasitet dhe kënaqësinë e pasagjerëve. Aeroporti ka tejkaluar vazhdimisht pritshmëritë, duke reflektuar ndikimin pozitiv të planifikimit strategjik dhe investimeve në infrastrukturë.

TIA shpreh mirënjohjen për pasagjerët e saj, partnerët e linjave ajrore dhe palët e interesuara për kontributin në këtë arritje të jashtëzakonshme. Aeroporti pret me padurim rritjen e vazhdueshme dhe ofrimin e një eksperience të pashembullt udhëtimi për të gjithë pasagjerët në vitet në vijim”,- thuhet në deklaratën e Aerportit Ndërkombëtar të Tiranës. (Irma)