Kryeministri sllovak (Foto Atsh)

Sllovakia do të zgjasë kontrollet në kufirin jugor me Hungarinë deri më 23 dhjetor, në mënyrë që të frenojë një rritje të emigracionit të parregullt.

“Kabineti i kryeministrit Robert Fico ra dakord të zgjasë kontrollet në kufirin jugor me Hungarinë”, njoftoi agjencia e lajmeve “Tasr”, citon “ATSH”.

Qeveria shprehu shqetësimin se lufta në Gaza mund të çojë në shtimin e emigracionit.

Veprimi i ashpër kundër emigracionit të parregullt ishte një nga premtimet e Ficos gjatë fushatës së fundit zgjedhore. Udhëheqësi i majtë mori detyrën për herë të katërt muajin e kaluar.

Dy vendet anëtare të BE-së i përkasin zonës Shengen që nga fundi i vitit 2007, në të cilën qytetarët normalisht mund të lëvizin pa kontrolle. Por, duke filluar nga fillimi i tetorit, Sllovakia, së bashku me vendet e tjera në Evropën Qendrore, vendosi kontrolle mes një rritjeje të emigrantëve që udhëtonin drejt perëndimit në rrugën ballkanike. (Irma)