Foto nga VCG
Një kalim afatgjatë në punën hibride, me stafin që ndan kohën midis punës nga shtëpia dhe në zyrë, mund të ketë një ndikim të paqëllimshëm në ekonominë e Londrës, thuhet në raportin “Politika e zyrës: Londra dhe ngritja e punës nga shtëpia”, botuar nga instituti i kërkimit dhe politikave “Qendra për qytetet”.
Raporti shikon ndikimin e mundshëm të paqëllimshëm në ekonominë e kryeqytetit britanik të adoptimit të përhershëm të aranzhimeve hibride të punës, bën të ditur “Xinhua”.
Bllokimet nga pandemia Covid-19 shkaktuan një eksperiment masiv në mënyrën se si funksionuan pjesë të mëdha të ekonomisë, me miliona njerëz që nisën të punonin nga shtëpia, thuhet në raport.
Një studim i porositur për kërkimin zbuloi se në prill 2023, punonjësit e Londrës qendrore shkonin në zyrat e tyre mesatarisht 2.3 ditë në javë, vetëm rreth 59 për qind e niveleve para pandemisë (janar 2020).
Ndërsa kthimi në zyrë ka të ngjarë të jetë një gjë e mirë për ekonominë e Londrës, ka pyetje nëse kjo do të jetë e mjaftueshme për të ofruar rritjen e produktivitetit që Londrës dhe ekonomisë më të gjerë të vendit i duhen dëshpërimisht.
Në veçanti, raporti thekson ndikimin në kreativitet, krijimin e njohurive dhe të mësuarit në vend të punës, për të cilin thotë se është më shumë një sfidë në një marrëveshje hibride ose plotësisht të largët.
Andrew Carter, drejtori ekzekutiv i “Qendra për qytetet”, tha se puna nga shtëpia ka sjellë shumë përfitime të menjëhershme për punëtorët në industritë e bazuara në njohuri, të tilla si reduktimi i udhëtimit dhe më shumë fleksibilitet.
“Por këto përfitime të menjëhershme duhet të balancohen me kostot e mundshme afatgjata të niveleve më të ulëta të kreativitetit dhe më pak të mësuarit në punë”,- tha Carter. (Irma)