Foto nga VCG

Shefja e Komisionit Evropian, Ursula von der Leyen, ka paralajmëruar kundër përdorimit të pakontrolluar të inteligjencës artificiale për të “angazhuar dhe pushuar” punonjës.

Duke folur në Kongresin e 15-të të Konfederatës Evropiane të Sindikatave, von der Leyen foli rreth planeve të Bashkimit Evropian (BE) për të rregulluar sistemet e inteligjencës artificiale.

“Çdo algoritëm është projektuar nga një programues dhe ky person ka një sfond, ky person ka paragjykime. Pra, asnjë nga algoritmet nuk është pa paragjykime,” tha von der Leyen, raporton AA.

Ajo shtoi se për këtë arsye, “ne duhet të jemi shumë, shumë të qartë”.

“Askush nuk duhet të pushohet nga puna për shkak të një algoritmi. Kjo nuk mund të ndodhë. Ne kemi nevojë për rregulla”, tha von der Leyen.

Ajo theksoi se Komisioni i BE-së po vëzhgon zhvillimet dhe mund të ndërmarrë hapa të mëtejshëm për të rregulluar përdorimin e algoritmeve në menaxhimin e burimeve njerëzore.

Top Channel