Meqë Kina ndodhet larg Shqipërisë, udhëtimi më i mirë dhe më i shpejtë është me aeroplan. Për të shkuar nga Tirana në Pekin, mund të shfrytëzoni shumë linja të ndërmjetme ajrore, si ato nga Italia, Austria, Hungaria e Turqia. Kështu ju mund të ndiqni itineraret Tiranë – Romë - Pekin, Tiranë – Vjenë - Pekin, Tiranë – Budapest - Pekin ose Tiranë - Stamboll – Pekin, dhe më pas të pritni biletën po në aeroportin e Pekinit për në Guangzhou. Gjithashtu ju mund të udhëtoni edhe nëpërmjet Stambollit për në Shangai dhe pastaj nga Shangai të fluturoni për në Guangzhou.

Bileta më e lirë është nëpërmjet linjës ajrore turke nga Stambolli në Shangai dhe më pas Shangai –Guangzhou. Gjithsesi, informacionet për udhëtimin mund t'i siguroni nga një kërkim i thjeshtë në internet.

Gjatë zhvillimit të Panairit të Guangzhout, bileta nga qytete të ndryshme të Kinës për në Guangzhou është shumë e shtrenjtë. Po qe se keni vendosur të vini në Guangzhou, më mirë ta porositni disa javë përpara biletën e aeroplanit. Ndoshta do të ketë ndonjë përqindje zbritjeje.

Përveç itinerareve të sipërpërmendura, ju mund të ndiqni edhe itineraret Tiranë – Romë – Hong-Kong, Tiranë – Vjenë – Hong-Kong, Tiranë – Budapest – Hong-Kong ose Tiranë – Stamboll – Hong-Kong, Tiranë – Stamboll - Hong-Kong dhe pastaj të udhëtoni me treni nga Hong-Kongu në Guangzhou. Ndoshta këto linja nga vendet evropiane në Hong-Kong dhe pastaj në Guangzhou do të jenë më të lira se linjat nga vendet evropiane në Pekin dhe pastaj nga Pekini në Guangzhou.