Leonardo DiCaprio mbërriti në Pekin mëngjesin e së dielës, duke nisur vizitën e tij njëditore gjatë së cilës promovoi debutimin e filmit "The Revenant", që i dhuroi Oskarin e shumëpritur, si dhe doli para mediave. Premiera e këtij filmi, e shfaqur më 18 mars në Kinë arkëtoi 208 milion yuan, ose 32 milion dollarë amerikanë që në ditët e para të shfaqjes. Leo u ndoq gjatë gjithë kohës nga fansa të shumtë, pranë hotelit ku qëndroi, në kinemanë ku u shfaq filmi si dhe në sallën ku mbajti konferencën për shtyp. Të gjithë donin ta shihnin nga afër ,por edhe të merrnin një autograf nga aktori i Hollivudit, kaq i dashur për kinezët, kryesisht të rinjtë. Shumë prej të rinjve, fansa të Leos kishin ardhur në Pekin nga qytete të ndryshme të vendit. Shumë i dashur me ta Leo nuk harroi, që nëpërmjet një video mesazhi të përshëndesë fansat e tij anembanë Kinës.

Dhuratat për Leon nuk munguan, madje as surprizat që mikpritësit kinezë i kishin rezervuar aktorit të njohur dhe të dashur për ta. Ai provoi kaligrafinë kineze dhe iu dhurua një vepër e kaligrafit të njohur Tian Boping në të cilën shkruhej "Zoti i ndihmon ata që punojnë shumë". Gjatë takimit me fansat Leos iu dhurua dhe një statujë e Oscarit, e krijuar me trëndafila të artë, por dhe një kaligrafi nga fansat ku shkruhej "Leo i vogël ne të duam" . (Eda Merepeza)