Jemi ne, jemi ne, n' gjitha trojet tona

Nuk na ndal dot askush, fluturon shqiponja

Po thërret toka jona, lisa edhe male

Se ne jemi një komb, Shqipëri e madhe…

Këto janë disa vargje nga bashkëpunimi i fundit i dy talenteve shqiptare Elvana Gjata dhe Flor Mumajesi, që tashmë është kthyer në një "Himn" për të gjith shqiptarët.

Elvana Gjata është këngëtarja shqiptare nga Tirana, e muzikë pop dhe RnB.

Emri i Elvana Gjatës nuk është i rastësishëm në botën e muzikës dhe as thjesht për të plotësuar ndonjë nga kapriçiot e moshës. Rruga e saj artistike ka filluar që fëmijë, me debutimet e saj të para në pallatin e pionierëve. Që në pjesëmarrjen e saj të parë, në Festivalin e Zërave të Rinj, vlerësohet me çmimin e tretë, me këngën 'Të këndojmë së bashku'. Ky çmim e inkurajon edhe më tej në rrugën e saj të saponisur.

Merr pjesë në spektaklin 'Kërkohet një yll', dhe në interpretimin e këngëve të Laura Pauzinit del në finale, nën shkëlqimin e një ylli të fshehur tek këngëtarja e re. E shtyrë nga i ati merr pjesë në edicionin e parë të show-t televiziv, 'Ethet e së premtes mbrëma'. Elvana, me një paraqitje të admirueshme skenike, por edhe me zërin e saj të ëmbël dhe melodioz do të fitojë simpatinë jo vetëm të stafit realizues, por edhe të publikut, i cili e ka votuar dhe e ka duartrotikur ngrohtësisht. Fati e ndjek nga mbrapa dhe ajo do të jetë një nga dhjetë finalistët e një prej spektakleve më të ndjekur në Shqipëri, ku evidentohet talenti i këngëtarëve të rinj.

'Ethet e së premtes mbrëma', më hapi dyert e suksesit, në rrugën e profesionalizmit muzikor', thotë Elvana, kur kujton momentet emocionuese nga ky spektakël , i cili ndezi dritën jeshile në rrugën e saj muzikore. Pas këtij spektakli, emri i Elvana Gjatës, nuk do të jetë më i panjohur, por do të fillojë bashkëpunimet me emra të njohur të muzikës shqiptare. Menjëherë pas 'Etheve', merr pjesë në një duet me Flor Mumajesin, I cili ishte solisti I grupit "The Dreams", në 'Maratonën e këngës popullore' dhe arrijnë të dalin edhe në finale, ku Elvana dallohet edhe në interpretimin e këngëve popullore. Në vitin 2003, merr pjesë përkrah emrave të njohur të muzikës shqiptare, në festivalin e RTVSH-ës, me këngën 'Pranë teje', me një tekst të shkruar nga ajo vetë, ku shumë shpejt do të realizojë ëndrrën e saj më të madhe.

Tek 'Kënga Magjike' e zhvilluar në Kosovë, paraqitet në një bashkëpunim po me Florin dhe Andy DJ. Kënga e saj 'Vetëm Zoti e di', pushtoi majat e hit-paredeve në Kosovë, por, edhe në Shqipëri, ishte një nga këngët më të dëgjuara në valët e radios 'Energy'. Ishte vetëm 18 vjeç kur filloi përgatitjet për albumin e saj të parë.Le të ndjekim një këngë të sajën, e cila pushtoj verën e 2010-ës, "Mamani nejen".

Dy motra, dy këngëtare. Ka qenë Migena, motra e madhe e Elvanës, ajo që e ka zbuluar si këngëtare. Ajo e ka shtyrë gjithmonë për pjesëmarrjet në konkurse dhe spektakle të ndryshme televizive. Migena është e diplomuar për kanto dhe për Elvanën, ajo ka qenë gjithmonë 'udhëheqësja e saj artistike'. Dy vajzat e familjes Gjata, vajzat e nënkolonelit Fatmir Gjata, në rrugën që ato kanë nisur, kanë gjetur gjithmonë mbështetjen e veçantë të babait të tyre, që padyshhim një pjesë e suksesit të tyre i dedikohet atij.

Ajo është mjaft e njohur, dhe ne thjesht mund të përmëndim disa tituj këngësh dhe të gjithë ju do të reagonit: Mamës, Vetes, mamani nejen, afer dhe larg, disco disco, Fake, kudo që jam, puthe, e shumë të tjera, si dhe bashkëpunimi i fundit me të madhin Flor Mumajesi të cilin e dëgjuam në hyrje të programit tonë. Flori, ka qënë ai i cili e ka përkrahur e mbështetur gjatë karierës së saj dhe sëbashku kan pasur shumë bashkëpunime të sukseshme, si dhe ky HIT "Kuq e Zi je ti", tashmë është një ndër këngët që luhet në çdo lokal, klub apo pab të Tiranës dhe në mbarë trevat SHQIP-FOLËSE. Ky bashkëpunim erdhi pas incidentit të ndeshjes së kombëtares tonë në Beograd të Serbisë. Kjo është një këngë theksojnë këngëtarët, dedikuar djemve të kombëtarës sonë që edhe në fushë-lojë vrapuan pas flamurit të tyre. Por si mund të lëm pa përmëndur këngën e saj "Puthe", e cila pushtoj verën e vjetshme. Ajo ishte imazhi i Albtelecom, dhe këngë e saj u bë kënga përfaqësuese e këtij spoti, madje edhe logoja e tyre ishte "Puthe". Le ta dëgjojmë Elvanën me "Puthe".(Raela)