20141619stadium1-2-3

Pas 64 vjetësh Brazili do të jetë për herë të dytë mikpritës i Kupës së Botës. Të gjitha ndeshjet do të zhvillohen në gjithsej 12 stadiume të shpërndara anekënd këtij vendi të madh latinoamerikan, duke mbuluar dy zona orare.

Brazili është një vend plot pasion, mirëpritës dhe frymëzues. Prandaj Kupa e Botës është gjithashtu një rast i përkryer për dashamirët e futbollit që të shkojnë aty për të parë e për të eksploruar peizazhet, kulturën dhe kuzhinën ekzotike të këtij vendi.

Në vijim po bëjmë një paraqitje të stadiumeve dhe të pikave të njohura turistike të qyteteve e zonave ku ndodhen ato.

1. Sao Paolo – "Arena" (65 807 vende)

Stadiumi "Arena" i qytetit Sao Paolo filloi të ndërtohet në vitin 2010 dhe është stadiumi ku do të zhvillohet ndeshja e hapjes së Kupës së Botës 2014 dhe një nga gjysmëfinalet. Në të ardhmen ky stadium do të shërbejë gjithashtu për zhvillimin e ndeshjeve të ekipit të Korinthiasit.

Sao Paulo

Sao Paulo është qyteti më i madh i Brazilit dhe një nga qytetet më të pasura në jug. I quajtur me përkëdheli edhe Sampa, Sao Paulo është një destinacion i pëlqyer nga turistët e vendeve të tjera që u pëlqejnë jeta e natës dhe festat.

 

Një simbol i këtij qyteti të begatë është Avenida Paulista. Ky bulevard, një nga zonat më të mëdha të biznesit në qytet, pasqyron edhe kulturën të pasur dhe shumëngjyrëshe të Sao Paulos. Pothuajse gjithçka për të cilën ka nevojë një turist, mund të gjendet brenda dhe përqark këtij bulevardi. Ka dyqane, galeri arti, restorante, kinema, librari dhe kafene për të plotësuar të gjitha kërkesat e mysafirëve. Është gjithashtu më e sigurt të ecësh natën nëpër rrugët e kësaj qendre biznesi sesa në zona të tjera të Brazilit.

 

Arti është gjithashtu me shumicë në Sao Paulo. Ky qytet ka muze ku shfaqen kryevepra për kënaqësinë tuaj. Mund t'i kërkoni udhërrëfyesit tuaj turistik që t'ju çojë në këto muze për të ditur më shumë rreth artit brazilian.

 

Për ata që duan të marrin pjesë në veprimtari në natyrë, Sao Paola ka parqe argëtimi. Një prej tyre është "Ibirapuera". Me një hapësirë 1.5 milion metra katrorë, ky park është një nga më të vizituarit nga ata që shëtitin ose vrapojnë. Ai ka korsi për ecje dhe ngarje biçiklete, fusha sportive dhe liqene e zona të tjera çlodhjeje e argëtimi, që e bëjnë atë tërheqës si për turistët e huaj, ashtu edhe ata vendës. Mjedisi i tij i këndshëm sjell qetësi për mendjen dhe trupin e çdo vizitori a vizitoreje.

 

Nëse doni të jeni më pranë natyrës, parku për t'u vizituar në Sao Paulo është Parque do Carmo. Ndonëse edhe ai ndodhet në një zonë 1.5 milion metra katrorë, ky park nuk është i urbanizuar si "Ibirapuera". Ajo që e bën edhe më natyror atë është pylli i shiut i mbrojtur. Ai pasqyron florën e Brazilit dhe madje frymëzon Festën e Pemëve të Qershive, që mbahet çdo vit në muajin gusht dhe ku marrin pjesë edhe shumë turistë. Parku Zoologjik i Sao Paulos është gjithashtu një vend i mirë për të kaluar ditën me familjen.

2. Natal – "Estadio das Dunas" (Stadiumi i Dunave) (42 086 vende)

Dunat e rërës përbëjnë një ndër pamjet më tërheqëse natyrore në qytetin e Natalit, prandaj edhe "Estadio das Dunas" (Stadiumi i Dunës) në këtë qytet është ndërtuar në formë dune.

Natali

 

Në një vend të madh si Brazili nuk mund të rrish pa eksploruar bukuritë që të rrethojnë. Një vend i mirë për të ndërmarrë një udhëtim është Qyteti i Diellit, i quajtur Natal. Ai është kryeqendra e shtetit Rio Grande do Norte.

 

Natali, që ka marrë një famë shumë të mirë si kryeqendra më e qetë dhe më e sigurt për të udhëtuar në Brazil, ka qenë gjithmonë një joshë e shkëlqyer turistike. Njerëz nga e gjithë bota dynden në plazhet e bukura të këtij qyteti për t'u çlodhur dhe për të shijuar pushimet. Turistët që vijnë në Natal, janë kryesisht nga Europa dhe Amerika e Veriut, për shkak se ai është një nga vendet më të përshtatshme për të udhëtuar nga këto zona në qoftë se doni të udhëtoni në tokën braziliane. Por, nga cilido kënd i globit të vini, udhëtimi për në Natal ia vlen, sepse ai të pret krahëhapur me plazhet e bukura dhe njerëzit e mrekullueshëm.

 

Ngaqë Natali nuk është një qytet gjigant, nuk do ta keni të vështirë ta vizitoni anekënd dhe është gjithashtu e lehtë të përdorni hartën. Nëse shkoni në Natal nga toka, do ta mësoni që po hyni në qytet nëse ndodheni tashmë në Autostradën BR-101.

 

Shumica e njerëzve shkojnë në Natal për të parë plazhet e tij të mrekullueshme. Plazhi më i famshëm është Ponta Negra, që ka të njëjtin emër me fshatin ku ndodhet. Për të shkuar atje duhet vetëm të udhëtoni disa kilometra poshtë Autostradës BR-101, pastaj do të arrini në një urë e cila ju tregon se jeni duke arritur në Ponta Negra. Kthehuni djathtas derisa të gjeni Avenida Engenheiro Roberto Freire. Ecni në të derisa të mbërrini në ujërat e bukura të plazhit Ponta Negra.

 

Nuk duhet të shqetësoheni se ku do të qëndroni, sepse në këtë zonë ka shumë hotele. Do të gjeni aty gjithashtu supermarkete dhe qendra tregtare, të cilat do të përmbushin nevojat tuaja. Ka edhe shumë plazhe të tjera ku mund të shkoni, si Praia dos Artistas, Praia do Meio dhe Praia do Forte.

 

Pavarësisht përshtypjeve që do të donit të merrnit me vete në shtëpi nga udhëtimi në Natal, një gjë është e sigurt: aty do t'ia kaloni vërtet mirë dhe me siguri do të takoheni me miq të mirë.

3. Belo Horizonte – "Mineirao" (62 547 vende)

Stadiumi "Mineirao", një prej objekteve historike të futbollit në Brazil, është përuruar më 5 dhjetor 1965. Ai i përket qeverisë vendore të shtetit Minas Gerais dhe prandaj emri i tij zyrtar është "Estadio Governador Magalhaes Pinto" (Stadiumi i Guvernatorit Magalhaes Pinto). Në këtë stadium do të luhet ndër të tjera një prej ndeshjeve gjysmëfinale të Kupës së Botës, si edhe një pjesë e garave të Lojërave Olimpike Verore 2016.

Belo Horizonte 

 

Belo Horizonte (që do të thotë "Horizont i bukur"), kryeqyteti i shtetit Minas Gerais, është qyteti i tretë për nga madhësia në Brazil, pas dy megaqyteteve Sao Paolo dhe Rio-de-Zhanejro. Ai tani vlerësohet si një nga qytetet në Amerikën Latine që ka cilësinë më të mirë të jetës. Belo Horizonte është bërë gjithashtu një qendër e madhe kulturore, me shumë institucione arsimore, biblioteka e muze historikë, si edhe disa stadiume.

 

Belo Horizonte është ndërtuar në kodra dhe është i rrethuar plotësisht nga male madhështore. Rrugët dhe lagjet e tij shfaqin disa karakteristika shumë interesante. Një nga gjërat më tërheqëse të qytetit është planimetria e tij si fushë shahu. Ecja nëpër rrugë mund të jetë e ndërlikuar, sepse ato ulen e ngrihen vazhdimisht. Por bulevardet e gjera me pemë e lehtësojnë orientimin.

 

Kur shkoni në Belo Horizonte, mos lini pa vizituar tregun në bulevardin "Afonso Pena" të dielën dhe ndërtesat e fudnshekullit të XIX që rrethojnë Praça da Liberdade (Sheshi i Lirisë).

 

Praça da Liberdade është një shesh i bukur, i veshur me pemë të harlisura palme. Ai qarkohet nga ndërtesa interesante të ndërtuara në shekullin e 19-të, duke përfshirë edhe selinë e Qeverisë së Shtetit, dhe një ngrehinë të lakuar të viteve '60 të shekullit të kaluar.

 

Një vend tjetër që duhet vizituar patjetër është Museu de Artes e Ofícios (Muzeu i Arteve dhe Mjeshtërive). Muzeu është vendosur në ndërtesat e shekullit të 19-të të ish-Stacionit Qendror të Trenit. Koleksionet tregojnë pasurinë e mjeshtërive dhe zejeve popullore në Brazil para industrializimit të tij.

 

Pampulha ia vlen ta vizitoni. Kjo lagje e viteve '40 të shekullit të kaluar thekson arkitekturën moderne të Brazilit, e cila përfshin edhe Kishën e São Francisco de Assis-it. Vetë struktura nuk është befasuese, derisa mëson se duhej të ishte një kishë. Nuk është habi që Kisha Katolike nuk pranoi ta shenjtëronte Kishën e São Francisco de Assis-it për më shumë se 10 vjet .

 

Parque Municipal është gjithashtu një ndër pikat më tërheqëse në Belo Horizonte. Ai është një oazë gjelbërimi mu në zemër të qytetit. Parque Municipal është i frymëzuar nga parqet franceze, siç dëshmohet nga lagunat e vogla dhe të këndshme ku mund të ushqeni rosat ose të merrni me qira një varkë. Në të ndodhen Casa dos Pneus, Casa Maluca dhe një park i vogël i bukur argëtues. Këto vende janë për fëmijët që gjithmonë duan të luajnë.