Në këtë artikull do të lexoni:

•Pranvera, stina kur lulëzon energjia Yang

•Dieta njëjavore pa karbohidrate

•Hani sallatë pa salca e majonezë

•Perime të ziera në avull

•Ujë të gazuar para buke

•Darka nuk duhet të konsumohet pas orës 19:00

Sipas Mjekësisë Tradicionale Kineze pranvera është stina që ringjallet energjia e brendshme "Yang", dhe rrjedhimisht kemi organizëm më të fortë dhe metabolizëm më të shpejtë. Për këtë themi se stina e pranverës është një nga stinët më të përshtatshme për t'u dobësuar, ndoshta ato pak kilogramë që i morëm në dimër, stinën e rezervimit të energjisë. Për të qenë sa më shumë në formë në stinën e verës, ju japim disa këshilla.

Dieta njëjavore

1. Konsumoni drithëra integrale në vend të bukës, orizit dhe makaronave

Për një javë duhet të hiqni dorë nga konsumi i bukës, orizit dhe brumërave të tjera dhe konsumoni më mirë drithëra integrale me qumësht apo kos.

Ose mund të konsumoni dhe supë orizi me perime apo alga deti, pasi këto ushqime janë të pasura me fibra dietike dhe përshpejtojnë metabolizmin. Po ashtu frenojnë thithjen e yndyrës dhe sheqerit nga trupi.

2. Shtoni vetëm vaj ulliri në sallatë

Pothuajse të gjithë dietologët sugjerojnë përdorimin e sallatës për dobësim. Shumë prej nesh megjithëse hamë sallatë, nuk lëmë pa shtuar edhe salcat, majonezin etij. Pikërisht këtu qëndron sekreti, nëse doni të dobësoheni dhe konsumoni sallatë me salca të ndryshme kalorike kjo mund t'ua bëjë edhe më të vështirë misionin tuaj për t'u dukur bukur. Salcat e sallatës përmbajnë të verdhe veze, sheqer, produkte qumështi etj., dhe megjithëse të gjitha këto janë të shijshme nuk ju ndihmojnë për t'u dobësuar, përkundrazi.

Sallata më e shëndetshme për dobësim është sallata e perimeve, dhe mund të shtoni vetëm vaj ulliri, i cili ka veti tepër të çmuara për organizmin, veçanërisht për reduktimin e kolesterolit në gjak. Nëse keni mundësi, shtoni alga deti në sallatën tuaj, për të përmirësuar problemet me kapsllëkun dhe për të reduktuar dhjamin e tepërt në zonën rreth belit.

3. Perimet e ziera ose në avull

Gjatë dietës në pranverë do të ndjeheni shpesh të uritur. Sa herë që keni uri mund të përgatisni perime në avull ose të ziera me pak kripë, uthull dhe vaj ulliri. Konsumi i perimeve në avull ndihmon për të ulur ndjenjën e urisë, por gjithashtu e furnizon ujin me vitamina dhe minerale. E mira e perimeve është se ato nuk përmbajnë shumë kalori. Këshillohet që në vend të ëmbëlsirave të konsumoni patate të ëmbël apo kos me mjalt.

Tortat, çokollatat dhe karamelet pëlqehen nga të gjithë ne. Sidomos kur jemi pa humor, një çokollatë apo një copë tortë duket se na lehtëson apo përmirëson humorin. Por, nuk duhet harruar se konsumi i tepërt i sheqerit është i dëmshëm për të gjithë organizmin, jo vetëm për bukurinë trupore. Personat që nuk bëjnë dot pa ëmbëlsira, mund të provojnë patatet e ëmbla dhe kungullin e verdhë. Këto dy perime të ëmbla përmbajnë sheqer natyral, fibrat dietike etj, duke nxitur procesin e tretjes në zorrë dhe metabolizmin.

4. Ujë të gazuar

Pirja e ngadalëshme e një gote uji të gazuar para vaktit ose gjatë vaktit është metodë efektive për të pakësuar ndjenjën e urisë dhe për të parandaluar konsumin e tepërt të ushqimeve. Përveç kësaj, uji i gazuar përmirëson qarkullimin e gjakut. Sipas studimeve mjekësore, uji i gazuar nxit metabolizmin.

Disa këshilla të tjera të mjekësisë kineze

Sapo të ngriheni nga gjumi mund të bëni stërvitje të thjeshta në shtrat për të forcuar elasticitetin e trupit.

Më pas, pini një gotë ujë të gazuar, për të stimuluar qarkullimin e gjakut rreth stomakut dhe për të rifilluar lëvizjen e zorrës.

Në mëngjes, mund të konsumoni drithëra me qumësht apo kos dhe një vezë, për të furnizuar trupin me proteina. Më pas mund të bëni pak stërvitje, ecje në këmbë, ngjitje-zbritje shkallësh etj.

Në mes të ditës, para drekës pini një gotë ujë të gazuar.

Pas 1 ose 2 orëve, nëse keni uri mund të hani pak kungull dhe patate të ëmbla.

Gjatë darkës mund të konsumoni perime në avull, së bashku me fasule, alga deti, vezë, mish pa dhjamë etj. Theksojmë se darka nuk duhet të konsumohet pas orës 19:00. Me anë të këtij zakoni trupi ka më shumë kohë për tretjen e ushqimeve para gjumit, duke parandaluar akumulimin e tepërt të ushqimeve në stomak. Përpiquni për shmangien e konsumit të ushqimeve para gjumit.

Nëse ndjeni uri gjatë kësaj kohe, mund të pini më shumë ujë të gazuar. Përveç kësaj, banja dhe masazhi i trupit mund të stimulojnë qarkullimin e gjakut, të çlirojnë muskujt e trupit dhe të çtendosin nervat. Këto masa mund të përmirësojnë cilësinë e gjumit dhe të shëndetin tuaj në tërësi.

Disa sugjerime të tjera praktike pas vakteve për shëndetin dhe dobësimin.

1. Konsumi i bananes pas mishit

Shumë dietologë thonë se mishi i kuq, nëse është i gatuar më tepër se sa duhet përmban helme që mund të shkaktojnë kancer. Por, sipas studimeve më të reja mjekësore, banania mund të frenojë rolin negativ të këtyre helmeve, duke mbrojtur stomakun dhe zorrët nga dëmtimet e tjera të jashtme.

2. Konsumi i hurmës pas vaktit

Hurma ka veti ushqyese për mushkëritë dhe shton sekretimin e pështymës, duke asgjësuar zjarrin e tepërt të brendshëm. Kjo është një ndër frutat e shëndetshme për ata persona që kanë probleme me frymëmarrjen. Por, hurma nuk duhet të konsumohet para vaktit, pasi acidi tanik në të mund të formojnë bllokime në stomak.

3. Rrepa e bardhë

Konsumi i rrepës së bardhë të pagatuar para vakteve është një metodë shumë e mirë për dobësimin. Sipas studimeve mjekësore rrepa e bardhë përmban shumë enzima të tretjes, që ndihmojnë metabolizimin dhe shmangin akumulimin e yndyrës në trup. Po ashtu, edhe lëngu i rrepës së bardhë favorizon dobësimin dhe mund të ulë nivelin e yndyrnave në gjak.