20131025stamaku

Stomaku dhe shpretka përgjigjen për të thithur materialet ushqyese. Sipas mjekësisë tradicionale kineze, e gjithë energjia e jetës pas lindjes që përfshin gjakun dhe ajrin, vjen nga funksionet e thithjes së stomakut dhe të shpretkës.

Prandaj, fuqia e stomakut dhe e shpretkës janë shumë të rëndësishme për jetëgjatësinë e njeriut. Mjeku i njohur kinez i Dinastinës Ming, Zhang Jingyue, i kushtoi vëmendje shumë të madhe shëndetit të stomakut. Ai tha se nëse stomaku është i shëdnetshëm, gjendja shëndetësore do të jetë e mirë; nëse stomaku është i dobët, gjendja shëndetësoe do të jetë e dobët; nëse stomaku nuk punon, nuk ka më jetë. Prandaj, çelësi i ruajtjes së shëndetit të mirë është vënia në vendin e parë të shëndetit të stomakut dhe të shpretkës.

Sipas teorisë së MTK-së, stomaku dhe shpretka bashkëpunojnë ngusht për punën e tretjes, të transportimit të materialeve ushqyese etj. Gjendja shëndetësore e tyre lidhet ngushtë me njëri-tjetrin. Si rezultat, veset e këqija mund të dëmtojnë njëkohësisht shëndetin e të dyja organeve dhe zakonet e mira mund t'i favorizojnë në të njëjtën kohë shëndetin e tyre.

9 zakonet e këqija që dëmtojnë shëndetin e stomakut dhe të shpretkës:

1. Ngrënia pa orar: stomaku është një organ që zbaton rreptësisht orarin e tretjes. Brenda një dite, stomaku nis sekretimin e lëngjeve tretëse në sasi të ndryshme. Pas tretjes prodhohet një sasi më e lartë me qëllim tretjen e ushqimeve në kohë. Nëse nuk zbatojmë orarin e ngrënies, aciditeti i lartë mund të dëmtojnë mukozën e stomakut.

2. Ngrënia tepër e shpejtë e ushqimit: gëlltitja e ushqimit pa e përtypur mirë më parë bën që të shtohet puna e stomakut, duke lodhur të gjithë organizimin. Përtypja jo e mirë e ushqimit do të sjellë edhe probleme në sistemin e aparatit tretës.

3. Mbingopja: Ngopja e tepërt jo vetëm që shkakton mbingarkesën e stomakut, keqtretjen, por edhe mund të sjellë sëmundje akute të stomakut si gastriti, ulcera etj. Mbingopja sidomos gjatë vaktit të darkës do të shkaktojë pasoja për stomakun, i cili do të sekretojë më tepër lëngje për tretjen gjatë natës, duke çuar në shfaqjen e ulcerës etj. Ky zakon dëmton jo vetëm shëndetin e stomakut, por edhe cilësinë e gjumit.

4. Ngrënia duke lexuar ose duke parë televizor: Shumë prej nesh na pëlqen të hamë duke lexuar gazetën, apo duke parë një film. Si rezultat, aktivitetet e leximit dhe argëtimit shkaktojnë furnizimin e trurit me shumë gjak, duke shkaktuar një mungesë të gjakut në aparatin tretës. Kjo do të ndikojë sekretimin e lëngjeve të tretjes, që mund të shkatojë sëmundje kronike të stomakut.

5. Konsumimi i tepërt i mezeve: Ky zakon do të shkatërrojë rregullat e zakonshme të stomakut për sekretimin e lëngjeve të tretjes. Stomaku do të nisë punën duke qenë i papërgatitur. Si rezultat, stomaku nuk ka kohën e mjaftueshme të pushimit dhe mund të preket nga sëmundje të ndryshme për shkak të lodhjes.

6. I ftohti dhe konsumi i ushqimeve të ftohta: Kur trupi ftohet stomaku ynë do të jetë i pari që do të reagojë nëpërmjet fenomeneve të tilla si dhimbje, gazra të përziera, diarre etj. Disa persona që pëlqejnë të konsumojnë ushqime të ftohta, veçanërisht gjatë stinës së verës, do të preken nga problemet e uljes së rezistencës së stomakut kundër sëmundjeve të ndryshme.

7. Konsumi i ushqimeve tepër pikante: Ushqimet pikante do të stimulojnë mukozën e stomakut. Konsumimi i shpeshtë i këtyre ushqimeve do të shkaktojë gastrit kronik.

8. Konsumi i tepërt i duhanit dhe i pijeve alkoolike: pirja e duhanit mund të shtojë incidencën e ulcerës dhe kancerit në stomak. Konsumi i tepërt i pijeve alkoolike mund të dëmtojë drejtpërdrejt mukozën e stomakut, duke shkaktuar gastritin, ulcerën dhe gjakderdhjen në stomak. Personat që konsumojnë shumë pije alkoolike kanë edhe probleme me rënien e oreksit.

9. Lodhja e tepërt: lodhja e tepërt shkakton jo vetëm uljen e rezistencës së trupit, por edhe dobësimin e mukozës së stomakut në rolin e mbrojtjes, si dhe furnizimin e paplotë të stomakut me gjak etj.

Zakonet e mira që favorizojnë shëndetin e stomakut

1. Ruajtja e gjendjes së mirë shpirtërore:

Elementet shpirtërore kanë tepër ndikim për oreksin, tretjen dhe thithjen e materialeve ushqyese në stomak. Emocionet negative mund të shkaktojnë uljen e oreksit, gazra të stomakut, keqtretjen etj. Por gjendja e mirë shpirtërore favorizon aktivitete normale të tretjes në stomak. Prandaj, mbajtja e emocioneve pozitive dhe gjendjes së mirë shpirtërore është një metodë shumë e vlefshme për shëndetin e stomakut.

2. Dieta e shëndetshme:

Ngrënia duhet të kryhet sipas orarit të rregullt. Në çdo vakt, sasia e ushqimeve të konsumuara duhet të jetë e qëndrueshme. Duhet të shmanget ngrënia e tepërt. Është një metodë e shëndetshme që të konsumohet mishi së bashku me perimet. Kosi është një ushqim i mirë që mund të ndihmojë tretjen e ushqimeve dhe metabolizmin në stomak dhe zorrë. Përveç kësaj, ushqimet si drithërat, patatet dhe fasulet që përfshijnë fibra dietike, mund të nxitin tretjen në stomak dhe të pakësojnë aktivitetin e baktereve të këqija.

3. Ruajtja e ngrohtësisë së trupit: pacientët që vuajnë nga sëmundjet e stomakut duhet t'u kushtojnë vëmendje të madhe masave për të ruajtur nxehtësinë e trupit, duke shmangur prekjen nga ftohtësia. Në të njëjtën kohë, duhet të pakësohet ngrënia e ushqimeve të ftohta. Nëse keni ftohje të stomakut, mund të përdoret çaji i xhenxhefilit.

4. Pjesëmarrja në aktivitete të përshtatshme sportive:

Aktivitetet e përshtatshme sportive mund të nxitin funksionet e tretjes në stomak dhe në zorrë, si dhe të përmirësojnë qarkullimin e gjakut në organizëm. Këtu theksojmë disa parime mbi aktivitetet sportive për shëndetin e stomakut. Është më e këshillueshme që aktivitetet sportive të zhvillohen para ngrënies. Pasi hamë drekë apo darkë mirë është të pushojmë për 1 deri 2 orë e më pas mund të bëjmë fiskulturë. Në librat e mjkësisë tradicionale kineze, është prezentuar një lloj masazhi i thjeshtë rrethor në bark, sipas kahut orar. Kjo ndihmon për të nxitur aktivitetin e tretjes dhe për të reduktuar dhimbjet e barkut.

5. Disa ushqimet e veçanta që favorizojnë shëndetin e stomakut dhe të shpretkës:

a. Domatja- ajo ka jo vetëm shije të mirë, por edhe disa "efekte magjike" për shëndetin e stomakut. Domatja përmban një sërë vitaminash e mineralesh po mbi të gjitha një antioksidant shumë të fuqishëm, likopen. Ajo përmban dhe një antibiotik bimor të quajtur tomatinë, që shërben për shërimin e sëmundjeve të lëkurës dhe aparatit tretës.

b. Lëkura e portokallit: Sipas MTK-së, lëkura e portokallit mund të përdoret si ilaç dhe ushqim i shëndetshëm për të nxitur metabolizmin në stomak dhe shpretkë, për të stimuluar oreksin dhe të ndaluar kollën. Mund ta pastrojmë lëkurën e portokallit dhe ta lëmë të ziejë së bashku me orizin në ujë të valuar. (Xu Guang)