Që nga prilli, në 70 kinema italiane do të zhvillohet festivali me temë "Ritakim me filmin ". Në festivalin që përshkon tërë prillin, organizuar me rastin e 70-vjetorit të çlirimit të Romës, do të shfaqet versioni dixhital i filmit "Roma, qytet i hapur" i mjeshtrit të neorealizmit italian Roberto Rosellini, i xhiruar në vitin 1945.

Ndonëse filmi ka lindur para 100 vjetësh, vetëm 10% e filmave të vjetër janë ruajtur deri më sot, ndërsa shumë filma klasikë kanë nevojë për restaurim. Kthimi i filmave të vjetër klasikë në ekran është një dëshirë e fortë e publikut, ndaj dhe festivali "Ritakim me filmin" do ta plotësojë dëshirën e tyre.

Sot në botë, nuk ka një standard të përgjithshëm për restaurimin e filmave të vjetër. Në procesin e restaurimit, Italia nuk përdor shumë mënyrën teknologjike, shmang shtrembërimin e mëparshëm figurativ dhe respekton mendimet artistike të autorit të filmit. Ky parim restaurimi i ngjan idesë italiane në restaurimin e relikeve të artit, ku ruhet stili origjinal i veprës.

Me këtë parim, shikuesit mund të admirojnë filma të vjetër origjinalë. Por restaurimi i filmave të vjetër kërkon shumë fonde dhe kjo nismë vështirë të realizohet pa përkrahjen e qeverisë. Në fakt, restaurimi i filmave të vjetër klasikë në Itali po zhvillohet nën kujdesin e organeve qeveritare. Qeveria italiane ka hartuar një projekt teknologjik të restaurimit të filmave të vjetër si dhe ka krijuar Institutin e posaçëm studimor për të përgatitur talente në këtë fushë. Krahas këtyre, qeveria italiane akordon ndihmë financiare për restaurimin e filmave të vjetër , duke zbatuar heqjen e taksave për organizatat jofitimprurëse. Me përkrahjen qeveritare, pas zhvillimit disa vjeçar, shumë studio kinematografike, arkive filmash dhe fondacione kanë marrë pjesë në restaurim dhe në ruajtjen e filmave të vjetër.

Sot në Itali ka disa studio të restaurimit të filmave të klasit të parë në botë, ndër to Arkivi i filmave i Bolonjës, mund të quhet shenjtore e restaurimit të filmave. Në Festivalin e 70-të të Filmit të Venecias, vitin e kaluar, dy filma kinezë të xhiruar në vitet 90' të shekullit të kaluar - "Në zemrën e diellit" i regjisorit Jiang Wen dhe "Pothuajse një histori dashurie" e regjisorit Chen Kexin u pranuan në "kategorinë e filmave klasikë" dhe u restauruan nga Arkivi i filmave i Bolonjës. Versioni i restauruar i këtyre filmave është i mrekullueshëm.

Për të nxitur zhvillimin e sektorit të restaurimit të filmave të vjetër, në vitin 1986, Italia themeloi festivalin e filmit "Ritakim përsëri me filmin". Krahasuar me festivale të tjera të filmit, ky festival nuk ka ceremoni madhështore, tapet të kuq, apo çmime. Qëllimi i këtij festivali të veçantë është restaurimi i filmave të vjetër klasikë.

Në kuadër të Festivalit "Ritakim me filmin" organizohen një sërë veprimtarish si leksione për restaurimin, ekspozita e pllakateve të filmave të vjetër, kursi i restaurimit të filmit, shitja e mallrave lidhur me filma të vjetër etj. Duhet përmendur se festivali organizon edhe aktivitete si "Marrëdhëniet midis figurës dhe zërit", "Lojëra optike" etj. Këto veprimtari organizohen për fëmijë 5 – 11 vjeç, me qëllim që çdo familje të bëhet pjesë e festivalit.

Mbrojtja e restaurimi i filmave të vjetër ka rëndësi të madhe për zhvillimin e industrisë së filmit të një vendi. Italia ka dhënë një shembull në këtë fushë dhe shpresojmë që vëmendja ndaj kësaj çeshtje të rritet. (Fani)