Autoritetet e bashkisë së Pekinit do të asistojnë projektimin dhe ndërtimin e linjave të tramit për Tiranën. Premtimi i tyre erdhi gjatë vizitës së kryetarit të bashkisë së Tiranës Lulzim Basha në Pekin.

Zoti Basha u prit në takime të veçanta nga kryetari i bashkisë së Pekinit Guo Jinlong dhe nga sekretari i Parë i Komitetit të Partisë së Pekinit Liu Çi, ku ka mori mbështetje për këtë projekt strategjik për Tiranën.

Kryetari i bashkisë së Pekinit i ofroi mundësinë zotit Basha, që të diskutojë në detaje për projektin e tramit, me një grup pune të ngritur për këtë qëllim dhe të drejtuar nga Kryetari i Komitetit të Planifikimit Urban të Pekinit Z. Ye Dahua e të përbërë nga drejtuesit e departamenteve dhe komisioneve më të rëndësishme në Bashkinë e Pekinit, të cilat kanë planifikuar, projektuar dhe zhvilluar sistemet e tramvajit e metrosë në Pekin.

Kryetari i bashkisë së Tiranës Lulzim Basha mori pjesë në Forumin "Zhvillimi i qëndrueshëm i qyteteve, Pekin 2012", në të cilin ishin të pranishëm kryetarë bashkish nga 25 qytete të botës, si Uashingtoni, Budapesti, Kopenhaga, Venecia, etj. (Leftion Peristeri)