Përqindjet e kontributeve për sigurimin e pensionit, të papunësisë dhe strehimit do të ulen për një periudhë 2 vjeçare, duke nisur nga 1 maji i këtij viti.
Kjo politikë e re synon lehtësimin e barrës fiskale të ndërmarrjeve dhe shtimin e të ardhurave të punonjësve. Vlerësohet se kompanitë kineze me zbatimin e kësaj politike të re do të kursejnë mbi 100 miliardë juanë, ose mbi 15 miliardë dollarë amerikane në vit.
Përse do të ulen përqindjet e kontributeve për pensionet, sigurimet e papunësisë dhe strehimin? Drejtori i Qendrës Studimore të Sigurimeve Shoqërore të Kinës pranë Universitetit Qendror të Financave dhe të Ekonomisë Chu Fuling u shpreh se ekonomia kineze përballet me trysninë e madhe të rënies dhe disa kompani kanë vështirësi menaxhimi. Për këtë arsye, duhet të lehtësohet barra e kompanive nëpërmjet uljes së përqindjes së kontributeve për sigurimet shoqërore, me qëllim shtimin e vitalitetit të biznesit dhe dhënien e përkrahjes për stabilitetin dhe zhvillimin ekonomik.
"Kjo masë ka karakter të përkohshëm dhe ka një frymë praktike e realiste. Kur ekonomia të rikthehet në rrugën e rritjes dhe fitimet e bizneseve të fillojnë të rriten, mund të rregullohen përqindjet e kontributeve përkatëse" u shpreh z. Chu Fuling. (Xu Guang/ Eda Merepeza)
