Kryeministri i Rusisë Dmidri Medvedev nënshkroi kohët e fundit një dekret, përmes së cilit, duke nisur që prej 1 janarit 2016, Rusia do të vendosë një tarifë doganore për mallrat e importuara nga Ukraina dhe do të anulojë të gjitha lehtësirat doganore. Bëhet e ditur se edhe presidenti rus Vladimir Putin ka vendosur përmes një dekreti largimin e Ukrainës nga Zona e Tregtisë së Lirë, duke pezulluar marrëveshjen. Edhe ky dekret pritet të hyjë në fuqi në fillim të vitit 2016.

Rusia forcoi më tej masat e kundërsankioneve ndaj Ukrainës për të përballuar Zonën e Tregtisë së Gjithanshme të Lirë midis Ukrainës dhe BE-së, që do të hyjë në fuqi më 1 janar 2016. Rusia beson se pranimi i Ukrainës në mekanizmin e tregtisë së lirë të BE-së ka mundësi ta shndërrojë atë në derën e prapme për eksportimin e mallrave të lira ndaj Rusisë, prandaj Rusia duhet të shtojë barrierat tregtare ndaj Ukrainës.

Gjatë një interviste për mediet vendore, ministri i Jashtëm i Ukrainës Pavlo Klimkin tha se vendimi i Rusisë për ndërprerjen e marrëveshjes së Zonës së Tregtisë së Lirë me Ukrainën, të arritur në kornizën e Bashkësisë së Vendeve të Pavarura, shkel normat ndërkombëtare, d.m.th. Konventën e Vjenës mbi të Drejtën e Traktateve, prandaj ky vendim nuk ka mundësi të zbatohet nga ana ligjore. (Wang Lei)