Të hënën u zhvillua në Pekin Dialogu i 34-t për Të drejtat e Njeriut Kinë-Europë. Të dyja palët shkëmbyen mendime lidhur me përparimet e reja dhe bashkëpunimin në fushën e të drejtave të njeriut, mbrojtjen e të drejtave të njeriut dhe të mjedisit, harmoninë shoqërore dhe çështje të tjera që kanë të bëjnë me të drejtat njerëzore. Të dyja palët ishin të mendimit se ky dialog ishte i sinqertë, i gjithanshëm e i thellë dhe arriti të nxitë njohjen e ndërsjellë.

Përfaqësuesit e palës kineze në dialog folën lidhur me rëndësinë që ka Plani i 13-të Pesëvjeçar për nxitjen e çështjes së të drejtave të njeriut dhe i kërkuan palës europiane që të shikojë objektivisht rezultatet e arritura nga Kina në fushën e të drejtave të njeriut. Pala kineze i paraqiti palës europiane shqetësimet e saj mbi probleme të tilla si mbrojtja e emigrantëve në Europë, ksenofobia, diskriminimi fetar etj., duke shprehur shpresën e saj për përmirësimin e këtyre problemeve. (Çang Çuo/Artan Goga)