Tirana forcoi masat e sigurisë, njoftoi të enjten drejtori i përgjithshëm i Policisë së Shtetit Haki Çako, ndërsa shtoi se autoritetet shqiptare kanë një listë të gjatë të individëve që kanë prirje të dhunshme ekstremiste.

Përforcimi i masave të sigurisë vjen pas sulmeve të së premtes së kaluar në Paris dhe alarmit të ngritur nga shërbimet inteligjente se Shqipëria është e rrezikuar nga kërcënimet terroriste.

"Ka një analizë të rrezikut për të gjithë njerëzit që janë identifikuar të kenë prirje të ndryshme. Ndaj kontrolli i dendur është i domosdoshëm," tha kreu i policisë.

Kështu çdo patrullë policie është e pajisur me armatim të rëndë për të reaguar menjëherë ndaj çdo vepre kriminale apo terroriste.

"Shqipëria është pjesë e luftës ndërkombëtare kundër terrorizmit ndaj ekziston rreziku potencial për të qenë objekt i ndonjë sulmi. Duhet të kemi vlerësime realiste dhe të vazhdojmë jetën tonë normalisht," deklaroi ministri shqiptar i Drejtësisë, Ylli Manjani. (Leftion Peristeri)