Në prag të mbledhjes së kryeministrave të Kinës dhe vendeve të Europës Qendrore dhe Lindore, revista ekonomike Monitor botoi një analizë të posaçme për investimet kineze në Ballkan dhe nivelin e tyre të ulët në Shqipëri.
Monitor shkruan se përtej konspiracioneve gjeopolitike, arsyeja reale se pse investimet e mëdha kineze që kanë "pushtuar" rajonin mungojnë në Shqipëri është se qeveria nuk i ka projektet fizibël. Revista shkruan se në vend që Shqipëria të përshtatet me planin e madh kinez, ku përqasen projektet e "Korridorit Blu" dhe ato në energjetikë, qeveria shqiptare i ka kushtëzuar investitorët aziatikë me "Rrugën e re të Arbrit" dhe "Portin e Shëngjinit", projekte pa fizibilitet.
Geri Selenica, Drejtor Ekzekutiv i Qendrës Shqiptare për Studime Strategjike, në një intervistë për "Monitor" shpjegon se kompani të mëdha kineze dëshirojnë të përfshihen në projektet e mëdha të infrastrukturës, por interesi i tyre lidhet me kryesisht me Brezin Ekonomik të Rrugës së Mëndafshit (Silk Road Economic Belt) të qeverisë kineze. Kjo strategji ka si qëllim krijimin e infrastrukturës ndërlidhëse midis Azisë, Europës dhe Afrikës për të integruar më mirë tregun më të madh ekonomik prej 4,5 miliardë banorësh.
Në harmoni me këtë strategji, Kina në Ballkan i ka dhënë prioritet "Korridorit 10", që fillon nga Pireu, në Selanik, Shkup, Beograd dhe Budapest, thotë Selenica. Dhe për këtë po financon dhe ndërton një hekurudhë të shpejtësisë së lartë Beograd-Budapest, marrëveshja për të cilën u firmos vjet në Takimin e Beogradit.
Selenica thotë se qeveria shqiptare është përpara sfidës së shekullit, që të arrijë të përfitojë nga "Korridoret e Mëndafshit". Dhe sipas tij, rruga më e mirë për ta bërë këtë është lobimi pranë Komisionit Europian për "Korridorin Adriatik" (zgjatim i 'Med Corrido' me hekurudhë e autostradë), që të zëvendësojë ose konkurrojë paralelisht me "Korridorin 10".
Ministeriali i Transportit, që do të zhvillojë Komisioni Europian në datën 3 dhjetor 2015 në Tiranë, është një ngjarje shumë e rëndësishme politike dhe ekonomike, pasi 7 vende (Italia, Sllovenia, Kroacia, Bosnja, Mali i Zi, Shqipëria dhe Greqia) do të firmosin bashkërisht për "Korridorin Adriatik" (Med Corridor).
Monitor nënvizon se investimet kineze në infrastrukturë do të bëhen në Shqipëri vetëm në kuadër të projekteve rajonale dhe nuk ka asnjë shans, që ato të bëhen vetëm si projekte lokale.
Për të përmirësuar gjendjen e tanishme Selenica i tha Monitorit se Shqipëria duhet të ketë projekte dhe të jetë serioze dhe precize në komunikimin me kompanitë kineze.
"Plus duhen disa shtytës ligjorë. Edhe kompanitë kineze kanë vështirësitë dhe paqartësitë e tyre në vende të vogla si Shqipëria. Kështu që duhet përmirësuar komunikimi. Kryeministri Rama, në mes të nëntorit do të bëjë takimin e katërt me kryeministrin e Kinës, brenda dy viteve, dhe do të qe mirë që të shkonte në Kinë me një paketë serioze propozimesh ekonomike, të përgatitura nga ekspertë të fushës dhe jo projekte të pacertifikuara, jofizibile e pa asnjë mundësi trafiku, si "Europorti i Shëngjinit" apo "Rruga e Arbrit", duke e vënë në një pozitë joserioze me bashkëbiseduesit kinezë," thotë ai për Minitor. (Leftion Peristeri)
