Turqia është pranë identifikimit të njërit prej dy të dyshuarve si autorë të dy shpërthimeve të së shtunës në Ankara, që vranë të paktën 97 veta, u shpreh të hënën kryeministri Ahmet Davutoglu.

Në një intervistë për rrjetin turk NTV, Davutoglu bëri të ditur se po bëhen analizat e ADN-së të mbetjeve të personave që kryen shpërthimet vetëvrasëse.

Sulmi i së shtunës ishte një përpjekje për të ndikuar në rezultatin e zgjedhjeve të parakohshme më 1 nëntor, vuri në dukje kreu i qeverisë turke, duke shtuar se do të ndërmerren hapat e nevojshëm për të përmirësuar më tej sigurinë.

Davutoglu vuri në dukje se Turqia është duke hetuar Shtetin Islamik (IS) si i dyshuari kryesor në shpërthimet e Ankarasë.

Zyra e kryeministrit njoftoi të hënën se "po vazhdojnë përpjekjet e identifikimit të trupave të dy terroristëve meshkuj, që janë përcaktuar si autorë të shpërthimeve vetëvrasëse".

Askush nuk ka marrë përgjegjësinë për sulmin, i cili kishte në shënjestër një tubim paqësor pranë një stacioni hekurudhor në Ankara, ku po bëhej thirrje për dhënien fund të konfliktit me kurdët dhe për reforma politike.