Kina është e angazhuar për zhvillimin paqësor global. Këtë e deklaroi të hënën presidenti kinez Xi Jinping gjatë fjalimit të mbajtur në Asamblenë e Përgjithëshme Vjetore të liderëve botërorë në Nju Jork. Kreu i shtetit Xi nënvizoi se Kina kurrë nuk do të ndjekë politikën e hegjemonisë, të zgjerimit të sferës së influencës, pavarësisht zhvillimeve ndërkombëtare apo forcimit të saj.

Si lider i ekonomisë së dytë më të madhe në botë, presidenti Xi premtoi akordimin e 1 miliard dollarëve amerikanë në dhjetëvjeçarin e ardhshëm, për të mbështetur përpjekjet e OKB-së në bashkëpunimin ndërkombëtar, paqen dhe zhvillimin botëror.

Ai tha se Kina do të krijojë një forcë të përherëshme paqeruajtëse prej 8 mijë trupash, për të vepruar kur të jetë e nevojshme. Kina është kontribuesi më i madh i trupave paqeruajtëse, ndër 5 vendet anëtare të përherëshme të Këshillit të Sigurimit të OKB-së. Ndër të tjera në fjalën e tij në OKB, presidenti Xi Jinping bëri të ditur se Kina do ti japë Bashkimit Afrikan një ndihmë ushtarake, me vlerë 100 milion dollarë amerikanë. (Eda Merepeza)