Pas 17 orë bisedimesh, Eurogrupi dhe Greqia arritën të hënën një marrëveshje mbi borxhin grek. Udhëheqësit e vendeve të Eurozonës u shprehën që kjo marrëveshje është një sinjal pozitiv dhe është në të mirë të stabilitetit të Eurozonës. Edhe tregjet ndërkombëtare kanë reaguar pozitivisht ndaj arritjes së marrëveshjes.

Zëdhënësi i FMN-së Gerry Rice theksoi të hënën se FMN-ja është e gatshme të bashkëpunojë me Greqinë dhe Europën për zgjidhjen e krizës së borxheve dhe do të përpiqet për të çuar përpara këtë proces.

Kancelarja gjermane Angela Merkel u shpreh për mediat se rruga është ende e gjatë dhe se, para se të përfundojë faza e 3-të e ndihmës për Greqinë, kreditorët dhe Greqia do të përballojnë shumë sfida.

Edhe sekretari i përgjithshëm i NATO-s Jens Stoltenberg e mirëpriti marrëveshjen mes Greqisë dhe Eurogrupit, pasi, sipas tij, ekonomia greke është e rëndësishme për Europën dhe NATO-n, si edhe për sigurinë rajonale.

Nën ndikimin e njoftimit për arritjen e marrëveshjes, tregjet europiane të aksioneve patën rritje të dukshme.(Jiang Lei)