Kancelarja gjermane, Angela Merkel, në përmbyllje të vizitës së saj në Tiranë, e shoqëruar nga kryeministri Edi Rama ka marrë pjesë në forumin ekonomik Shqipëri- Gjermani. "Gjermania është e gatshme të investojë në Shqipëri dhe kërkohet që investimet të jenë në terren të sigurt nga pikpamja ligjore, duke shfrytëzuar epërsine që ka Shqipëria si vend investimi dinamik. Këtu ka shumë burime, thesare nëntokësore, burimet e naftës, po kështu dhe fusha hidrike që ka mundësi zhvillimi.", tha kancelarja Merkel. Më tej në fjalën e saj ajo theksoi se "Ligji i ri për investimet e reja të huaja si dhe krijimi i zonave ekonomike me status të vecantë, janë hapa të rëndësishm, sikurse dhe reforma në sistemin e drejtësisë, por ka edhe pengesa të tjera për të cilat duhet punuar, si për shembull krijimi i një administrate efiçente publike, apo lufta kundër korrupsionit apo krimit të organizuar".

Nga ana e tij kreu i qeverisë shqiptare Rama shfrytëzoi forumin e përbashkët ekonomik për t'u bërë thirrje bizneseve gjermane të investojnë në Shqipëri. Ai tha se qeveria ka ndërmarrë një sërë reformash për të përmirësuar klimën e biznesit dhe nxitur zhvillimin ekonomik të vendit. (ATSH)