Sekretari i përgjithshëm i Organizatës së Bashkëpunimit të Shangait (OBSh) Dmitri Mezentsev shprehu shpresën të enjten në Shën-Petërburg se në samitin e Organizatës së Bashkëpunimit të Shangait, që do të zhvillohet në qytetin Ufa të Rusisë, do të miratohet strategjia e zhvillimit të kësaj organizate deri në vitin 2025.

Dmitri Mezentsev theksoi se strategjia e zhvillimit të Organizatës së Bashkëpunimit të Shangait deri në vitin 2025 do të jetë një dokument i gjithanshëm, me rëndësi të madhe orientuese për thellimin e bashkëpunimit të kësaj organizate në 10 vjetët e ardhshëm. Sipas tij, zbatimi i kësaj strategjie do të jetë në të mirë të forcimit të ndikimit të Organizatës së Bashkëpunimit të Shangait, duke siguruar pjesëmarrjen më të gjerë e më efektive të organizatës në zgjidhjen e problemeve të rëndësishme ndërkombëtare.

Duke folur për nismën e Kinës të "Brezit Ekonomik të Rrugës së Mëndafshit", sekretari i përgjithshëm i Organizatës së Bashkëpunimit të Shangait Dmitri Mezentsev vuri në dukje se ky propozim do të nxitë ndërtimin e infrastrukturës së Organizatës së Bashkëpunimit të Shangait, duke forcuar potencialin ekonomik të këtij rajoni. (Fani)