Shqipëria po merr pjesë në Konferencën e Koordinimit të Turizmit që organizohet në kuadër të Ekspozitës së Tregtisë dhe Investimeve në Ningbo të Kinës.

Më herët të hënën, gjatë takimit me ndihmësin e ministrit të Tregtisë së Kinës, Wang Bingnan, zv/ministri i Jashtëm i Shqipërisë, Selim Belortaja, i dorëzoi zyrtarit kinez 'pasaportën turistike', një libërth që përmban burimet e turizmit shqiptar.

Belortaja tha se shpreson se përmirësimi dhe rritja e dialogut midis dy vendeve do të shtojnë numrin e turistëve. "Politika më të mira nga të dyja vendet mund të nxisin turizmin dhe shtojnë numrin e udhëtarëve që vizitojnë të dy vendet tona," shtoi ai.

Zoti Wang uroi që Shqipëria do të bëjë një prezantim të suksesshëm para investuesve në Konferencën e Koordinimit të Turizmit midis Kinës dhe vendeve të Europës Qendrore e Lindore. (Leftion Peristeri)