Bashkimi Europian, ka vendosur të zgjerojë sanksionet e tij ndaj Rusisë për shkak të konfliktit në Ukrainë.

Ministrat e jashtëm të BE-së ranë dakort në një sesion të jashtëzakonshëm në Bruksel, i cili u mbajt pasi dhjetra persona vdiqën nga luftimet në portin lindor ukrainas të Mariupol-it.

Shefja e politikës së jashtme të BE-së, Federica Mogherini u shpreh:

"Ne kemi vendosur të zgjatim masat kufizuese që u vendosën në mars të vitit të kaluar ndaj personave dhe subjekteve . Ne vendosëm sot që t'i shtyjmë ato deri në shtator të këtij viti."

Sanksionet u futën pas aneksimit të Krimesë nga Rusia, duke goditur më shumë se 100 figura ruse dhe ukrainase. Masat janë caktuar të përfundojnë në muajin mars.

Kreu i administratës të Kremlinit në Moskë, Sergei Ivanov, akuzoi sërish Perëndimin se po përdor situatën konfliktuale në Ukrainë si një mjet për qëllime gjeopolitike. (RAELA)