Presidenti rus Vladimir Putin e ka fajësuar ushtrinë e Ukrainës për përshkallëzimin e dhunës në lindje të vendit.

Duke folur për median pas një takimi me studentë në Shën-Petersburg, Putini e quajti ushtrinë ukrainase "një legjion i huaj i NATO-s."

"Ata kanë qëllime krejtësisht të ndryshme, të lidhura me kontrollin gjeopolitik të Rusisë, gjë që nuk përputhet aspak me interesat kombëtare të popullit ukrainas," u shpreh kreu i Kremlinit.

Komentet e Putinit bëhen pas kërcënimeve të Perëndimit se Rusia mund të përballet me sanksione të tjera për veprimet e saj në Ukrainën Lindore, ku 30 njerëz u vranë në qytetin bregdetar Mariupol të shtunën.

Sekretari i Përgjithshëm i NATO-s Jens Stoltenberg i ka hedhur poshtë fjalët e Putinit si "të pakuptimta" dhe e ka akuzuar Rusinë për dhënien e një numri të madh armësh të rënda separatistëve.

Moska këmbëngul se nuk po mbështet rebelët në Ukrainë. (Artani)