Të paktën 14 vetë u vranë dhe mbi 100 të tjerë u plagosën në lindje të Ukrainës ditët e fundit, si pasojë e përleshjeve midis forcave qeveritare dhe atyre pro pavarësisë. Zëdhënësi i operacioneve ushtarake të qeverisë në lindje të vendit, Andriy Lysenko ka deklaruar se gjatë përleshjeve me rebelët kanë mbetur të vrarë 3 ushtarë ukrainas dhe janë plagosur 66 të tjerë.

"Është rritur numri dhe intensiteti i sulmeve në pozicionet e luftimit të ukrainasve," tha Lysenko duke shtuar se forcat rebele kanë qëlluar 99 herë kundër ushtarëve në 24 orët e fundit.

Komandanti i rebelëve, Eduard Basurin ka njoftuar se gjatë luftimeve të së dielës kundër ushtarëve ukrainas janë vrarë 8 luftëtarë dhe janë plagosur 33 të tjerë.

Ndërkohë departamenti rajonal i ministrisë së brendshme ukrainase në Donetsk ka bërë të ditur se të paktën 3 civilë, përfshirë dhe një djalë 12 vjeçar janë vrarë, ndërsa 12 të tjerë janë plagosur si pasojë e sulmeve gjatë natës në qytezën Debaltsevo. (Eda Merepeza)