Në ditën e dytë të qëndrimit në Beograd, kryeministri shqiptar Edi Rama në një intervistë për Top Channel e ka vlerësuar samitin midis Kinës dhe vendeve të Evropës Qendrore dhe Lindore si mjaft të rëndësishëm për rajonin.

"Samiti është me një rëndësi për të gjithë vendet e rajonit sepse bëhet fjalë për një nismë konkrete dhe për projekte konkrete. Besoj dhe shpresoj që të finalizojmë një përpjekje 1vjeçare, që na ka çuar në një formulë të re inovative për financimin e Rrugës së Arbërit, e cila do t'i propozohet më tej nga kryeministri kinez edhe vendeve të tjera që nuk mund të thellojnë borxhin dhe të marrin garancitë sovrane. Nga ana tjetër, kemi një sërë marrëveshjesh të tjera me palën kineze në marrëdhëniet dypalëshe për infrastrukturën, zonat industriale dhe për mbështetjen e rilindjes së bujqësisë përmes një financimi të ndjeshëm në rehabilitimin e gjithë sistemin e ujitjes dhe kullimit", tha Rama (Eda Merepeza)