Firma britanike e studimit të tregut "Markit" publikoi të mërkurën të dhënat mbi gjendjen e tregut në Eurozonë. Sipas këtyre të dhënave, në muajin nëntor Treguesi kompleks i Menaxherëve të Blerjes (PMI) në Eurozonë ka rënë në 51.1, duke shënuar vlerën më të ulët gjatë 16 muajve të fundit. Një rënie e tillë ka shtuar shqetësimet e tregut mbi perspektivën e ekonomisë së Eurozonës.

Ekonomisti i lartë i "Markit"-it Chris Williamson theksoi që PMI-ja ka rënë në nivelin më të ulët që prej mesit të vitit të kaluar, që do të thotë se rritja ekonomike e Eurozonës në tremujorin e 4-t mund të jetë vetëm 0.1 %. "Po presim mëkëmbjen e kërkesës në treg, përndryshe ekonomia e Eurozonës do të përballet me recesion. Përveç kësaj, të dhënat tregojnë se përkeqësimi i ekonomisë po përhapet në vendet kryesore të BE-së, prej të cilave Franca ende ka më shumë rrezik potencial," u shpreh Williamson.(Jiang Lei/Artani)