Kryeministri kinez Li Keqiang foli të martën në telefon me Sekretarin e Përgjithshëm të OKB-së Ban Ki Mun lidhur me rritjen e kërcënimit të ebolës, duke i bërë thirrje bashkësisë ndërkombëtare për t'u bashkuar kundër virusit vdekjeprurës.

Epidemia e ebolës në Afrikën Perëndimore, vuri në dukje Li, ka rrezikuar shëndetin dhe jetën e njerëzve në vendet e prekura, ka penguar seriozisht zhvillimin ekonomik e qëndrueshmërinë shoqërore të këtyre vendeve dhe përbën një kërcënim për shëndetin publik global.

Bashkësia ndërkombëtare duhet të shtojë bashkërendimin dhe bashkëpunimin për të luftuar së bashku sëmundjen, u shpreh kryeministri kinez. Ai shtoi se përparësia kryesore tani është që të sigurohen më shumë furnizime, fonde dhe personel mjekësor në zonat e goditura nga ebola, të udhëzohet publiku për ta trajtuar epideminë në mënyrën e duhur dhe të forcohet besimi se beteja me ebolën do të fitohet.