Qeveria kineze është shprehur e shqetësuar për rrëzimin e avionit të Malaysia Airlines fluturimit MH17. Një deklaratë e Ministrisë së Jashtme thekson se Kina shpreson për gjetjen sa më shpejt të shkaqeve të rrëzimit.

Gjithashtu sekretari i përgjithshëm i OKB-së Ban Ki-moon ka shprehur ngushëllime për incidentin dhe ka kërkuar një hetim ndërkombëtar.

Kryeministri holandez Mark Rutte e ka përshkuar ngjarjen si tragjedinë më të madhe në historinë e Holandës.

Në një reagim, zv-presidenti amerikan Joe Biden tha se rrëzimi i avionit malajzian "nuk është një aksident."

"Kjo është me të vërtetë një situatë e vështirë, kanë humbur rreth 300 shpirtra. Familjarët kanë nevojë për ngushëllime dhe lutjet tona. Ka shumë pyetje që duhet të marrin përgjigje. Ata (familjarët) do t'i marrin këto përgjigje dhe ne do të ndërmarrin hapin e radhës," tha Biden. (Leftion Peristeri)