Kryeministri kinez Li Keqiang është shprehur se rritja ekonomike pak më shumë ose më pak se 7.5 për qind sivjet është e pranueshme për sa kohë që ende krijon vende të reja pune dhe paga më të larta.

Analistët mendojnë se komentet e fundit të kryeministrit kinez tregojnë njëfarë fleksibiliteti në arritjen e objektivit të rritjes vjetore dhe e vënë më shumë theksin në reformën sesa thjesht rritjen. Ato gjithashtu mund të pasqyrojnë optimizmin në rritje tek politikëbërësit se ekonomia po rimëkëmbet pas një vale stimujsh me politika.

Rritja ekonomike e Kinës arriti në 7.5 për qind në tremujorin e dytë pas hyrjes në fuqi të këtyre politikave. (Artani)