Ngjyra e kaltër ka pushtuar qytetin e Manaus në Brazil, ku u zhvillua supersfida mes Italisë dhe Anglisë, e fituar me rezultatin 2-1 nga 4 herë kampionët e botës. Ndeshja e vlefshme për grupin "D", të kampionatit botëror të futbollit, që po zhvillohet në Brazil, nxorri në pah se skuadra angleze vijon të ketë sulmin thembrën e saj të akilit, ndërsa rikonfirmoi se mbrojtja italiane vijon të jetë një nga më të mirat në botë.

Sfida nisi e shpejtë dhe me shumë raste, duke i dhuruar emocione të shumta 40 mijë tifozëve që ndodheshin në stadiumin "Arena e Amazonave" në qytetin Manaus të Brazilit, si dhe mijëra shikuesve nga e gjithë bota.

Kjo është fitorja e dhjetë e italianëve në ndeshje direkte me Anglinë. Ndërsa ishullorët kanë 8 suksese.

Kjo fitore e ngjit Italinë në kuotën e 3 pikëve, aq sa edhe Kosta Rika, që fitoi mbrëmjen e djeshme me Uruguajin, që ashtu si Anglia kanë nga 0 pikë. Në ndeshjet e dyta të grupit "D" do të ndeshen Italia me Kosta Rikën dhe Anglia me Uruguajin. (ata.gov.al)