Organizata për Ndalimin e Armëve Kimike(OPCW) deklaroi të dielen se, për shkaqe sigurie, 7.5% deri 8% e armëve kimike nuk janë transportuar ende nga territori sirian. Koordinuesi i posaçëm i delegacionit të përbashkët të OPCW-it dhe të OKB-së Sigrid Kaag gjatë një konference për shtyp njoftoi se transporti i armëve kimike nga Siria është në proces. Kjo është hera e dytë që transporti i armëve kimike tejkalon afatin.

Sipas raportit të publikuar nga Organizata për Ndalimin e Armëve Kimike në nëntor të vitit të kaluar, transporti i armëve duhet të kishte përfunduar para datës 5 shkurt, por për shkak të ngadalësimit të procesit, afati u shty deri në 27 prill. Sipas Kaag asgjësimi i armëve kimike siriane pritet të përfundojë para 30 qeshorit.