Banka Qendrore Europiane (BQE) bëri të ditur se do të ndërmarrë "stimuj të mëtejshëm" për ekonominë e Eurozonës, nëse inflacioni në bllok vazhdon të mbetet i ulët.

Presidenti i BQE-së, Mario Draghi, tha se një euro më e fortë do të shkaktonte një politikë më të lirshme monetare.

Draghi la të kuptohej se mund të nevojitet lehtësimi sasior, blerja në një shkallë të gjerë e mjeteve financiare.

Më herët gjatë muajit, BQE-ja e mbajti të pandryshuar normën bazë të interesit, në nivelin më të ulët historik prej 0,25%.

Megjithatë, kreu i BQE-së tha se vendet anëtare janë dakord për nisjen e lehtësimit sasior (QE) nëse inflacioni do të qëndrojë poshtë objektivit të tyre prej 2%.