Në raportin e mbajtur gjatë sesionit të dytë të legjislaturës së 12-të të Asamblesë Kombëtare Popullore të Kinës, kryetari i Gjykatës së Lartë Zhou Qiang, vuri në dukje disa mangësi burokratike në punën e gjyqësorit.

"Disa gjykatës dhe stafe gjykatash kanë shfaqur burokraci në veprimtarinë e tyre si dhe gëzojnë privilegje të padrejta. Janë vërejtur marrje ryshfetesh që ka ngjallur pakënaqësinë e qytetarëve", tha Zhou . Sipas tij, 381 gjykatës dhe pjesë e personelit të gjykatave në vend kanë abuzuar me detyrën, ndërsa 101 prej tyre janë ndjekur penalisht.

Ai theksoi se reforma në gjyqësor përfshin rritjen e transparencës dhe pavarësinë nga politika në këtë sistem, i cili nuk bazohet plotësisht në ndarjen administrative. (Eda Merepeza)