Kryeministri kinez Li Keqiang premtoi të martën se do të luftohet korrupsioni, do të rritet transparenca e qeverisë dhe do të sigurohet një qeverisje e pastër.

Gjatë një mbledhjeje të Këshillit të Shtetit me temë luftën kundër korrupsionit, Li kërkoi menaxhim të rreptë të buxhetit nga të gjitha departamentet e qeverisë dhe u bëri thirrje audituesve të kontrollojnë me hollësi çdo veprimtari të dyshimtë, duke theksuar se të gjitha të dhënat për të ardhurat e shpenzimet duhet të përfshihen në menaxhimin e buxhetit.

Kryeministri kinez përshëndeti përparimin e arritur vjet në nivele të ndryshme në luftën kundër korrupsionit dhe për krijimin e një qeverisjeje të pastër, por pranoi se korrupsioni ekziston ende dhe është i shpeshtë në fusha të caktuara.

Duke kërkuar tolerancë zero ndaj zyrtarëve të korruptuar, Li premtoi zbatimin e plotë të tetë pikave të udhëzuesit kundër burokracisë dhe shpenzimeve të tepërta, të publikuar nga autoritetet qendrore në fund të vitit 2012. (Artani)