Kreu i shtetit i Kinës Xi Jinping dhe homologu i tij rus Vladimir Putin zhvilluan të enjten një video-konferencë me komandat detare të vendeve të tyre, pjesë të misionit për transportin e armëve kimike siriane. Komandantët i informuan të dy presidentët për mbylljen me sukses të misionit të tyre në Detin Mesdhe gjatë shoqërimit të dy ngarkesave të para me armë kimike dhe shtuan se janë të gatshëm për misionin e rradhës.

Xi i përgëzoi komandantët për punën e tyre dhe i inkurajoi për përfundimin e misionit të mandatuar nga OKB-ja, lidhur me largimin e armëve kimike të Sirisë, me qëllim zgjidhjen paqësore të krizës siriane.

Nga ana e tij, presidenti Putin përshëndeti trupat detare, duke theksuar se atyre u është besuar detyra e rëndësishme për ruajtjen dhe më pas shkatërrimin e armëve kimike të Sirisë.(Eda Merepeza)