Kryeministri Edi Rama takoi të mërkurën kryeministrin kinez Li Keqiang, në kuadër të samitit Kinë – Europa Qendrore dhe Lindore.

Zyra e Shtypit e kryeministrit njofton se gjatë takimit, zoti Rama theksoi rëndësinë e marrëdhënieve dypalëshe mes Shqipërisë dhe Kinës, si edhe prioritetin që qeveria shqiptare u ka dhënë projekteve rajonale në fushën e transportit, infrastrukturës dhe energjisë. Kryeministri Rama e njohu homologun kinez me reformat e ndërmarra nga qeveria shqiptare, si edhe me disa nga projektet kryesore në fushat e lartpërmendura.

Kryeministri kinez, Li Keqiang, e uroi zotin Rama për fitoren e zgjedhjeve dhe drejtimin e suksesshëm të qeverisë. Zoti Li vlerësoi marrëdhëniet e deritanishme mes dy vendeve dhe theksoi nevojën për nxitjen e tyre në fushën e tregtisë dhe industrisë.

Zyra e Shtypit e qeverisë, flet për konkretizimin e projekteve në energjetike dhe industri, por nuk jep detaje se cilat projekte.

Më herët, kryeministri Rama takoi homologun polak, çek, sllovak dhe estonez. (Leftion Peristeri)