Kryeministri kinez Li Keqiang bëri të martën një propozim prej gjashtë pikash për thellimin e bashkëpunimit me vendet e Europës Qendrore e Lindore, gjatë takimit të liderëve Kinë-Europë Qendrore e Lindore.

Së pari, Kina dhe vendet e Europës Qendrore e Lindore duhet të intensifikojnë bashkëpunimin ekonomik dhe tregtar, duke e dyfishuar vëllimin e tregtisë mes tyre brenda pesë vjetësh dhe duke diskutuar një marrëveshje kornizë për investimet industriale në të ardhmen e afërt.

Së dyti, të dy palët duhet të nxisin bashkëpunimin në infrastrukturë, duke krijuar linja tokësore e detare që lidhin Kinën dhe Evropën.

Së treti, Kina dhe vendet e Europës Qendrore e Lindore duhet të shtojnë "bashkëpunimin e gjelbër".

Së katërti, të dyja palët duhet të zgjerojnë kanalet e financimit. Ato duhet të shtojnë bashkëpunimin financiar duke ngritur degë të institucioneve të tyre financiare në tregjet e njëri-tjetrit e duke nënshkruar marrëveshje shkëmbimi monetar.

Së pesti, Kina dhe vendet e Europës Qendrore e Lindore duhet të shfrytëzojnë më tej potencialet e bashkëpunimit në nivel lokal.

Së gjashti, Kina dhe vendet e Europës Qendrore e Lindore duhet të zgjerojnë shkëmbimet kulturore.

Takimi i liderëve Kinë-Europë Qendrore e Lindore pason samitin Kinë - BE që u zhvillua javën e kaluar në Pekin.

Kryeministri Li e filloi vizitën e tij në Rumani të hënën. Kjo është vizita e tij e parë në Evropën Qendrore dhe Lindore që kur ai mori detyrën në mars.