Paraditen e 25 nëntorit kreu i qeverisë kineze, Li Keqiang u nis për një vizitë zyrtare në Rumani, e treta vizitë e tij jashtë vendit këtë vit.

Kjo është vizita e parë e një kryeministri kinez në Rumani, pas 19 vjetësh. Në axhendën e vizitës së Li Keqiang-ut në Rumani përfshihen takimet me homologët e vendeve të Evropës Qendrore dhe Lindore.

Në fokus të takimeve do të jetë "bashkëpunimi, përfitimet dhe zhvillimet e përbashkëta", njofton ministria e jashtme kineze. Ndërkohë gjatë takimeve pritet të shpallen masat e rëndësishme të bashkëpunimit si dhe do të publikohet një rezolutë rreth prioriteteve të bashkëpunimit në të ardhmen.

Në deklaratën e ministrisë së jashtme të Kinës theksohet se gjatë takimeve dypalëshe me 15 kryeministrat e vendeve të Evropës Qendrore dhe Lindore, përfshirë dhe kryeministrin e Shqipërisë Edi Rama, Li Keqiang do të diskutojë për bashkëpunimin në fushat e energjisë bërthamore, hekurudhave, energjisë termike, bujqësisë dhe materialeve të ndërtimit.(Xu Guang/Eda Merepeza)