Presidenti sirian Bashar al-Assad u takua të mërkurën në Damask me të dërguarin e përbashkët të Kombeve të Bashkuara dhe Lidhjes Arabe për krizën siriane, Lakhdar Brahimi.

Bëhet e ditur se ky takim zgjati më pak se një orë. Duke cituar presidentin sirian, televizioni shtetëror i Sirisë tha se bisedimet për zgjidhjen e çështjes siriane do të quhen të suksesshme vetëm në momentin kur palët e ndryshme do të ndalojnë përkrahjen, dhënien e fondeve dhe pajisjen me armë ndaj kryengritësve.

Lakhdar Brahimi mbërriti në kryeqytetin sirian të hënën për të diskutuar mbi konferencën e dytë të Gjenevës për çështjen e Sirisë. Një ditë më pas ai zhvilloi bisedime me përfaqësuesit e fraksioneve opozitare siriane. (Du)