Kina do të vazhdojë të luajë një rol konstruktiv për një zgjidhje paqësore të programit bërthamor të Iranit, tha presidenti kinez Xi Jinping gjatë takimit në Pekin me kryetarin e parlamentit të Iranit Ali Larijani që ndodhet për vizitë në Kinë.
Xi u shpreh se Pekini e mirëpret ndryshimet pozitive që kanë ndodhur në dialogun midis Iranit dhe fuqive perëndimore dhe shtoi se marrëdhëniet e mira Kinë-Iran jo vetëm u përshtaten interesave të të dy vendeve, por ndikojnë edhe në stabilitetin e Lindjes së Mesme.
Xi shtoi se Kina është e gatshme që të vazhdojë marrëdhëniet e miqësisë tradicionale me Iranin dhe të nxitë zhvillimin e shëndetshëm dhe të qëndrueshëm të bashkëpunimit dypalësh.
Larijani nga ana e tij ka dërguar Xi Jinpingut përshëndetje të ngrohta nga lideri suprem Ajatollahu Ali Khamenei dhe presidenti Hassan Rohani.
Ai u shpreh se Irani u kushton rëndësi marrëdhënieve me Kinën dhe dëshiron të shtojë bashkëpunimin ekonomik, në energji dhe investime. Krahas këtyre, Larijani ka prezantuar qëndrimin e Teheranit për programin bërthamor dhe gjendjen në rajon. (Jiang Lei/Leftion Peristeri)