销毁---Xiāo Huǐ---Shkatërrim/ Asgjësim

Ekipi i Organizatës për Ndalimin e Armëve Kimike të OKB-së po vijon hetimet në Siri dhe bëhet e ditur se ecuria e punës për shkatërrimin e arsenalit kimik të këtij vendi po shkon sipas parashikimeve.

Këshilltari i posaçëm i sekretarit të përgjithshëm të Organizatës për Ndalimin e Armëve Kimike, Malik Ellahi u shpreh se megjithëse aktualisht disa zona ku ndodhen armët janë ende fushë beteje, ose kontrollohen nga fraksionet opozitare, qeveria siriane ka asistuar ekipin e hetuesve, ndaj Organizata për Ndalimin e Armëve Kimike beson se do të asgjësohet arsenali. Malik Ellahi gjithashtu deklaroi se ende po zhvillohen konsultime për hyrjen e grupit të hetimit në zonat që nuk kontrollohen nga ushtria.

Më herët, Organizata për Ndalimin e Armëve Kimike njoftoi për ecurinë e hetimeve duke thënë se në 11 pika ku gjenden armët kimike brenda Sirisë, instalimet dhe lëndët kryesore që përdoren për prodhimin e armëve kimike, janë shkatërruar nga qeveria siriane.

Siaps marrëveshjes së arritur nga SHBA-ja dhe Rusia lidhur çështjen e armëve kimike siriane, deri në mes të vitit 2014 qeveria e Damaskut duhet të asgjësojë të gjitha armët e saja. Megjithëse Ellahi ka besim të plotë për këtë, ekzistojnë ende vështirësi. Koha e shkurtër në dispozicion e shpenzimet e larta financiare, janë pjesë e vështirësive.

Aktualisht Siria përballet me një krizë të rëndë ekonomike, sanksionet perëndimore si dhe ngrirjen e aseteve të Sirisë jashtë vendit, gjë që pengon në financimin e operacioneve për shkatërrimin e armëve kimike. Njëkohësisht rebelët opozitarë vijojnë luftimet, kërcënimi i terrorizmit ekziston kudo dhe nuk mund të garantohet as siguria e anëtarëve të grupit të hetimit.

Shumë vende kanë shprehur mbështetjen për dhënien e fondeve për asgjësimin e armëve kimike të Sirisë. Në një situatë të tillë, Organizata për Ndalimin e Armëve Kimike thotë se me ndihmën e bashkësisë ndërkombëtare, arsenali kimik i Sirisë mund të asgjësohet deri në mesin e vitit 2014. (Vera)