Sekretari i Përgjithshëm i Kombeve të Bashkuara Ban Ki- moon do të mbledhë Konferencën e dytë të Gjenevës për Sirinë, tha të enjten zëdhënësi i OKB-së, Martin Nesirky.

"Po bëjmë përpjekje që kjo konferencë të zhvillohet në mes të nëntorit në Gjenevë", shtoi Nesirky.

Zëdhënësi i OKB-së tha gjithashtu se i dërguari i përbashkët për Sirinë, Lakhdar Brahimi, do të jetë në rajon për konsultime me palët përkatëse që kanë lidhje me konferencën.

Sipas Nesirky-t, ende nuk dihet nëse Irani do të jetë i pranishëm ose jo në këtë konferencë. Megjithatë zyrtarët e OKB-së janë shprehur më herët se pjesëmarrja e Iranit është e dobishme. (Albana)