Ministri i Jashtëm i Iranit Mohammad Javad Zarif tha për mediet amerikane se Irani, SHBA-ja dhe komuniteti ndërkombëtar kanë bërë hapin e parë drejt zgjidhjes së çështjes bërthamore, duke pranuar se Irani është i gatshëm për zhvillimin e negociatave, njoftoi të dielën Agjencia kineze e Lajmeve "Xinhua".

Palët e ndryshme ranë dakord që të mblidhen në tetor në Gjenevë për raundin tjetër të dialogut mbi problemin bërthamor të Iranit. Më 26 shtator, ministri i Jashtëm i Iranit shkëmbeu pikëpamjet me ministrat e Jashtëm të 6 vendeve, të Kinës, SHBA-së, Rusisë, Britanisë, Francës dhe të Gjermanisë.

Një ditë më vonë, presidenti amerikan Barak Obama dhe homologu i vet iranian Rohani zhvilluan një bisedë telefonike. Ky është dialogu i parë i drejtpërdrejtë midis udhëheqësve të të dy vendeve pas më shumë se 30-vjetëve kur u ndërprenë marrëdhëniet diplomatike dypalëshe. (Du)