Komiteti i marrëdhënieve me jashtë i Senatit amerikan miratoi rezolutën për të autorizuar presidentin Barak Obama për një ndërhyrje ushtarake ndaj Sirisë, në përgjigje ndaj përdorimit të armëve kimike.

Dokumenti u miratua me 10 vota pro dhe 7 kundër. Mbështetësit e tij ishin shtatë anëtarë demokratë dhe tre republikanë; kundër votuan dy anëtarë demokratë dhe pesë republikanë, ndërsa një senator abstenoi.

Në këtë rezolutë përcaktohet se afati për përdorimin e forcës nga administrata amerikane është 60 ditë, me mundësinë që të shtyhet edhe për një muaj. Aty kufizohen veprimet ushtarake brenda kufirit të Sirisë dhe ndalohet dërgimi i batalioneve tokësore për operacione.

Pavarësisht miratimit të së mërkurës, fati i rezolutës në Senat mbetet i paqartë, teksa votimi pritet javën e ardhshme. Ndërkohë që edhe Dhoma e Përfaqësuesve duhet që të aprovojë këtë dokument. (Du)