Ekipi hetimor i OKB-së për armët kimike në Siri nis sot në zonën Ghouta mbledhjen e fakteve, pas incidentit të fundit të përdorimit të tyre .

Qeveria siriane ka shprehur gatishmërinë për bashkëpunim, përfshirë dhe sigurimin e qetësisë në zonën ku ndodhi incidenti, deklarojnë burime nga OKB.

Nga dita e sotme, misioni i Kombeve të Bashkuara, është i përgatitur për mbledhjen e fakteve, ka thënë sekretari i përgjithshëm i OKB-së, Ban Ki-moon, i cituar nga zëdhënësi i tij.

"Të gjitha palët duhet të ndajnë përgjegjësitë dhe të bashkëpunojnë, për t'i siguruar misionit një mjedis të sigurtë, në realizimin e detyrës për mbledhjen e informacionit të nevojshëm", ka deklaruar Ban Ki-moon.

Më 21 gusht opozita siriane njoftoi se 1300 vetë u vranë në periferi të Damaskut, si pasojë e përdorimit të armëve kimike nga forcat qeveritare, kundër një bastioni militantësh. Kjo akuzë e opozitës është mohuar nga qeveria siriane. (Eda Merepeza)