Sekretari i Përgjithshëm i OKB-së Ban Ki Mun dënoi me forcë të dielën "përshkallëzimin e dhunës në Egjipt" dhe u kërkoi "të gjithë udhëheqësve egjiptianë t'u bëjnë thirrje mbështetësve të tyre të tregojnë vetëpërmbajtje."

Ban i bëri këto deklarata në bisedat e veta telefonike me zëvendëspresidentin e përkohshëm egjiptian Mohamed El-Baradei.

Numri i të vdekurve nga përleshjet që shpërthyen në Egjipt të premten dhe vazhduan deri në orët e para të së shtunës u rrit në 75, njoftoi Ministria e Shëndetësisë e Egjiptit.

Të premten, miliona egjiptianë u mblodhën në Kajro e zona të tjera në mbështetje të kreut të Forcave të Armatosura dhe ministrit egjiptian të Mbrojtjes, për të treguar miratimin popullor për masat e ashpra të ushtrisë kundër "ekstremizmit dhe terrorizmit". (Artani)